Xavier é Catedrático de Economía Aplicada na Universidade de Vigo. A súa traxectoria destaca por combinar unha sólida carreira académica na economía ecolóxica cun firme compromiso polo desenvolvemento e sustentabilidade do medio rural galego.

Doutorouse en Ciencias Económicas en 1995 cunha tese sobre desenvolvemento rural. Dende entón desenvolve a súa actividade docente e investigadora na Facultade de Ciencias Económicas e Empresariais de Vigo, onde lidera o grupo de Investigación en Economía Ecolóxica e Agroecoloxía, un equipo que promove alternativas produtivas e enerxéticas respectuosas co medio ambiente e coa sociedade. Tamén é director de transferencia do Centro de Investigación Interuniversitario das Paisaxes Atlánticas Culturais (CISPAC), e dirixe o Observatorio Eólico de Galicia (OEGA). A través desta entidade, exerce unha labor moi importante de investigación e asesoramento a comunidades de montes e colectivos veciñais afectados pola transición enerxética, procurando un reparto máis xusto dos beneficios no territorio. Tamén foi alcalde do seu concello natal, Arbo, entre 2011 e 2014.

No seu tempo libre, Xavier practica o lecer agroecolóxico (cultivo hortícola, frutícola e vitivinícola) e forma parte de diversos movementos sociais. Participa na Comunidade de Montes Veciñais en Man Común (CMVMC) da súa parroquia e lidera a comunidade enerxética Portabouza, en Cabeiras, Arbo. En definitiva, Xavier é unha persoa amante da natureza, da vida e das comunidades locais, comprometida en conectar a transición ecolóxica coa defensa socioeconómica do rural de Galicia.